बुधबार, फाल्गुन १४, २०७६
पञ्चकन्यामा माघ १ गते गोरु जुधाई मेला हुने - नुवाकोट एक्स्प्रेस : मोफसलकै लोकप्रीय डिजिटल एक्स्प्रेस

पञ्चकन्यामा माघ १ गते गोरु जुधाई मेला हुने



घलेभञ्ज्याङ (नुवाकोट) । माघे संक्रान्तिको अवसरमा पञ्चकन्या गाउँपालिका ३ घलेगाउँ पीपलडाँडामा पाँचौं गोरु जुधाई मेला हुने भएको छ ।

इतिहासको संरक्षण र पर्यटन प्रवर्द्धनको उद्देश्यसहित स्थानीय युवाहरुका सक्रियतामा माघ १ गते गोरु जुधाई मेला हुन लागेको हो । आयोजक नवप्रतिभा युवा समूहका अध्यक्ष शिवहरि विष्टले गोरु जुधाई मेलाको तयारी अन्तिम चरणमा पुगेको जानकारी दिए । गोरु दर्ताको समय पुस १० देखि २८ सम्मलाई तोकिएको छ ।

मेलामा प्रथम हुने गोरु धनीले १५ हजार, दोस्रोले १० हजार र तेस्रो पुरस्कार ५ हजार रुपैयाँ कायम गरिएको छ । गोरु जुधाउन थप्रेक, समुन्द्रादेवी, पञ्चकन्या, भद्रुटार र महाकालीका किसानले सहभागी हुने गर्छन् ।

कार्यक्रममा साउन्ड सिस्टम, प्रचारप्रसार, मैदान व्यवस्थापन, कलाकार र अतिथि लगायतको खाना खर्च, पुरस्कार लगायतमा ३ लाख रुपैयाँ खर्चको अनुमान गरिएको छ । जसमध्ये १ लाख ५० हजार नेपाल पर्यटन बोर्ड र अपुग रकमका लागि चन्दा संकलन भइरहेको अध्यक्ष विष्टले जनाए । उनका अनुसार गोरु जुधाई कार्यक्रम बिहान ११ बजेदेखि सुरु हुने छ ।

घलेगाउँमा विसं २०७२ देखि गोरु जुधाई मेला चल्दै आएको छ । पञ्चकन्याको गोरु जुधाई मेला अवलोकनका लागि टोखा–छहरे सडकखण्डको छहरेबजार हुँदै काठमाडौंबाट झन्डै ४५ किलोमिटरको दूरी पार गर्नुपर्छ । हिउँदेयाममा कञ्चीसडक चालु रहेकोले गुर्जेभञ्ज्याङ-सुनखानी-भद्रुटारको कुण्डलामा मावि हुँदै उत्तरी भेगमा रहेको घलेगाउँमा सवा घण्टामा पुग्न सकिन्छ ।

मकर सङ्क्रान्ति पर्वको अवसरमा नुवाकोटका तारुका, पञ्चकन्यासहित विभिन्न स्थान, धादिङ, गोरखालगायत जिल्लामा समेत गोरु जुधाई प्रतिस्पर्धा एवं परम्परालाई निरन्तरता दिने गरिन्छ ।

बझाङी राजा जयपृथ्वीबहादुर सिंहको पालामा विसं १८८७ तिर गोरु जुधाई सुरु भएको इतिहास छ ।

माघे सङ्क्रान्तिमा नदी किनार र घाटमा स्नान गरी चाकु, घिउ, तरुल लगायत मिष्ठान्न भोजन गर्ने परम्पराका साथमा नुवाकोटमा भने सदियौंदेखि गोरु जुधाएर छुट्टै मनोरञ्जन लिइँदै आएको छ।

    हाम्रो टिम

    हाम्रो बारेमा

    नुवाकोट एक्सप्रेस डटकमको लागी
    सम्पादक: उमेश खनाल
    संवाददाता: असिमदोर्जे तामाङ
    संवाददाता: समिक भण्डारी
    संवाददाता: प्रविण थपलिया
    संवाददाता: उषा रेग्मी 
    संवाददाता: हरी भेटुवाल
    बिज्ञापन र समाचारको लागी सम्पर्क: 9849295617, 9808953040
    प्रेस काउन्सिल सुचिकृत नम्बर : ८२० / ०७५ / ०७६
    सूचना तथा प्रशारण विभाग दर्ता नम्बर:  १०९९ / ०७५ / ०७६
    ईमेल- [email protected]

Subscribe

© copyright 2019 and all right reserved to Nuwakot Express | Site By : SobizTrend Technology